EasyBlog

This is some blog description about this site

भारत4इंडिया

लक्षवेधी!

  • Font size: Larger Smaller
  • Hits: 887
  • 0 Comment

नागपूरच्या हिवाळी अधिवेशनाला सुरुवात झालीय. राज्याच्या कारभाराचा अख्खा गाडा नागपूरच्या थंडीत दरवर्षीप्रमाणं येऊन दाखल झालाय. संपूर्ण राज्याचा कारभार नागपूरमधून चालावा, नागपूरला मिळालेला उपराजधानीचा दर्जा यातून केवळ मुंबईकेंद्रित प्रशासकीय निर्णय होऊ नयेत. मागासलेल्या, अतिदुर्गम भागांकरता विकासाची वाट खुली व्हावी, विदर्भातील सामान्य जनतेला सोयीनं नागपूरपर्यंत येता यावं यासाठी हा प्रपंच होता.

 

सध्या स्थिती वेगळी आहे. पूर्वी सत्ताधारी पक्षांवर नागपूर अधिवेशनाचा मोठा दबाव असायचा. विरोधक कमालीचे आक्रमक असायचे. सभागृहातील चर्चासुद्धा वादळी आणि कधी कधी विनोदाच्या पखरणीनं समृद्ध असायच्या. कुठेतरी ही भट्टी आता जमताना दिसत नाहीये. राज्यात एकेकाळी ग्रामीण भागातल्या आमदारांचा दबदबा होता. अभ्यासपूर्ण भाषणं असोत वा वत्कृत्वाचा फर्डा फड असो, हे सगळं जोरात सुरू असायचं. अधिवेशन अनेक दिवस चालायचंच. आता नागपूरला विमानं आलीत. विमानतळ झालंय. सोमवारी जायचं आणि शुक्रवारी आपापल्या शहरात उड्डाण घ्यायचं, अशी नवी शहरी आमदारांची फळी गेल्या विधानसभा निवडणुकांनंतर संख्येनं वाढली, ज्यातले अनेक जण महानगरपालिकांचे नगरसेवक ते आमदार अशा प्रवासातले. मग ग्रामीण भागाच्या प्रश्नांसाठी अट्टहास कोण करणार?

विरोधी पक्षांमध्ये एकवाक्यता नाही, त्याचाही परिणाम या अधिवेशनावर दिसतो. जेमतेम दोन आठवडे हे अधिवेशन चालण्याची शक्यता आहे. कामकाज त्यात किती काळ होणार? अशातच शहरी प्रश्नांवरून होणारे गदारोळ आणि विरोधकांमधला बेबनाव ही स्थिती सत्ताधारी पक्षाला पोषकच आहे. त्यामुळंच नागपूरचं अधिवेशन हे आता केवळ सोपस्कारापुरतं होतंय की काय, अशी अवस्था आली आहे.

नागपूर अधिवेशनातल्या सभागृहाच्या या घडामोडींपलीकडं 'लक्षवेधी' असतात त्या खरं तर इथल्या रात्री रंगणाऱ्या मैफली, संत्रा बर्फी आणि संत्रा ज्यूसचे स्टॉल्स. अगदी दिल्लीसारखे प्रशस्त वाटावेत असे 'सिव्हिल लाइन्स' परिसरातले रस्ते, मंत्र्यांचे बंगले आणि लाल दिव्यांच्या मोटारींचे ताफे.

'नक्षलवादा'सारखा विषय तसा अजेंड्यावरून मागं पडला असला तरी विदर्भातल्या कापूस, धान आणि आता सोयाबीन, तसंच सिंचनाच्या प्रश्नावरून तरी हे अधिवेशन गाजावं, अशी सामान्य अपेक्षा यानिमित्तानं आपण करूयात. अधिवेशनाच्या अखेरीस या विषयांचं नेमकं काय झालं? विदर्भाला काय मिळालं? या प्रश्नांची उत्तरं आपल्याला मिळतील. या प्रश्नांसोबतच विदर्भातील खाणी, जंगलांवरील अतिक्रमणं, जंगलांना लागणारे वणवे; तसंच गोंड, कोरकू, माडिया या आणि अशा अनेक वंचितांचे प्रश्न किमान अजेंड्यावर प्राधान्यानं यावेत, अशी एक 'लक्षवेधी' अपेक्षा यानिमित्तानं आपण सर्वांनीच करूयात.

Comments

  • No comments found

Leave your comments

0
Use 'Ctrl+G' to toggle commenting language from Marathi to English and vice versa.

'भारत4इंडिया.कॉम' ही मुख्यत्वे संस्थापक संपादक मंदार फणसे यांची संकल्पना. गेली 14 वर्षं ते पत्रकारितेत आहेत. सुरुवातीला 'अल्फा मराठी', त्यानंतर 'झी न्यूज', 'एनडीटीव्ही', 'सीएनएन-आयबीएन,' 'आयबीएन-लोकमत' असा त्यांचा पत्रकारितेचा प्रवास झालाय. सध्या ते 'जय महाराष्ट्र' या 24 तास न्यूज चॅनेलचे संपादक आहेत. झुऑलॉजी, इतिहास आणि एन्थ्रोपॉलॉजी हे त्यांचे अभ्यासाचे विषय आहेत. 'भारत' आणि 'इंडिया'मध्ये असलेली दरी सांधण्यासाठी काय करता येईल, याबाबतचे विचार त्यांच्या मनात बरेच दिवस घोळत होते. त्यातूनच 'भारत4इंडिया.कॉम' या वेबपोर्टलचा जन्म झाला. हे पोर्टल म्हणजे ग्रामीण भारताचं पहिलं न्यूज नेटवर्क आहे. 'भारत' आणि 'इंडिया'तली दरी सांधली गेल्यास देशाचा सामाजिक आणि आर्थिक चेहरामोहरा नक्कीच बदलेल, असा त्यांना ठाम विश्वास आहे. 'ब्रेकिंग न्यूज'च्या पलीकडची दृष्टी ठेवून पाहिलेलं मीडियाचं त्यांचं स्वप्न प्रत्यक्षात उतरलंय.